Wednesday, August 29, 2012

உணவு வகைகள் -- சுலைமானி...

அனைவருக்கும் வணக்கம் நண்பர்களே.

அமீரகம்:

ஊரை விட்டு ஊர் வந்தால் நாம் ஆராய்ச்சி செய்யும் முக்கியமானவற்றில் ஒன்று அந்த ஊரின் உணவுப் பழக்க வழக்கங்கள். முதன்முதலாய் வெளிநாடு கிளம்பும் பொழுது விமானம் ஏறும் வரை குடும்பத்தை பிரிந்து செல்கிற உணர்வில் மனம் கனத்து இருப்போம். பின்பு அதுவரை அறிந்திராத பல குடியேற்ற விதிமுறைகளை அறிந்து எல்லா கட்டுப்பாடுகளையும் முறையாகப் பின்பற்றி விமானத்தில் ஏறி அமர்ந்ததும், விமானத்தின் உள்புறத்தையும், சிப்பந்திகளையும் கண்டு வியந்து , ஏசி ஓடிக்கொண்டிருந்தாலும் சற்று நேரம் வியர்த்து பின்பு அடங்கும், நாமும் கொஞ்சம் இயல்பு நிலைக்கு திரும்புவோம்....

ஒரு வழியாக விமானப்பயணம் முடிந்து அமீரகம் வந்து சேர்ந்தபின் கண்டவைகளைப் பற்றி இந்தப் பதிவு. இப்ப நாம பார்க்கப் போவது அமீரகத்தில் உள்ள உணவுப்பொருட்கள் மற்றும் உணவுகளைப் பற்றி.

பல நாட்டு மக்கள், பல மொழிகள்,பல கலாச்சாரங்கள் கொண்டவர்கள் வேலை பார்த்துக் கொண்டு வாழுமிடம் அமீரகம். இது தவிர சுற்றுலாப் பயணிகளும் மிகுதியாக வந்து போகுமிடங்களில் ஒன்று அமீரகம். இங்கு ஒரு தெருவிலோ, சாலையிலோ நடந்து சென்றால் காதில் பல மொழிகள் கேட்கும். வித விதமான மக்கள் அங்குமிங்கும் வேலை செய்து கொண்டிருப்பதையோ, சுற்றுலா காட்சிகளை கண்டு களிப்பதையோ  காண இயலும்.

உணவுகள் ஒரு பார்வைனு தலைப்பு வச்சிட்டு இப்படி ஏதேதோ சொல்லிக்கிட்டு இருக்கிறேன் என்று நினைக்கிறீங்களா....!? இதோ வந்துட்டேன்....
இப்படி பல நாடுகள் மற்றும் கலாச்சார மக்கள் வசிக்கும் இடமென்றால் கண்டிப்பாக அவர்களின் உணவுகளும் இங்கே கிடைக்குமல்லவா... 
ஆமாம்... அமீரகத்தில் அனைத்து வகை உணவுப் பொருட்களும், உணவுகளும் கிடைக்கும்.... நாடுகள் மற்றும் கலாச்சார இனங்கள் சார்ந்த உணவகங்கள் பல இங்கிருக்கின்றன.

உணவுப்பொருட்கள்:

இங்கும் காய்கறி சந்தை இருந்தாலும், பெரும்பாலும் மக்கள் உணவுப்பொருட்கள் வாங்குவதி பெரிய பெரிய சூப்பர் & ஹைப்பர் மார்க்கெட்களிலும் மற்றும் க்ராசரி (Grocery) என்றழைக்கப்படும் சிறிய பலசரக்கு கடைகளிலும்தான். இந்தக் கடைகளில் உணவுப் பொருட்களின் வகைகளுக்கேற்ப தனித்தனியா அழகாக,  பெயர் மற்றும் விலை விபரங்களோடுஅடுக்கி வைக்கப்பட்டிருக்கும்.
      
 
 

கருவாடு முதல் கம்ப்யூட்டர்கள் வரை அனைத்தும் சூப்பர் மற்றும் ஹைப்பர் மார்க்கெட்களில் கிடைக்கும்.


இது போன்ற ஒரு   ட்ராலியைத் தள்ளிக் கொண்டு போய்,தேவையான பொருட்களை அதில் நிரப்பி வந்து பணம் கட்டி வாங்கிக் கொள்ளலாம். (பெரிய லாரியைக் கூட ஓட்டிடலாம், இந்த ட்ராலியை நம்ம நினைச்ச திசையில் தள்ளுவதும் ரொம்ப கடினம் :-)

இங்கு உணவுப்பொருட்கள் விற்பதற்கு நிறைய கட்டுப்பாடுகள் இருப்பது மட்டுமல்லாமல் முறையாகவும், கடுமையாகவும் பின்பற்ற வேண்டும். இல்லையென்றால் முனிசிபாலிட்டி கடுமையான நடவடிக்கைகள் எடுத்து விடுவார்கள். மக்கள் உணவுப் பொருட்கள் வாங்கும் போது பெரும்பாலும் இரண்டு விசயங்களைப் பார்ப்பார்கள். 1: Made in எந்த நாட்டு தயாரிப்பு என்பது; இரண்டு: Expiry Date. இதைப் பார்த்துதான் பொருட்கள் வாங்குகிறார்கள்.  

எல்லா உணவுப்பொருட்களும் பாக்கெட்களிலும், டின்களிலும், கேன்களிலும் அடைச்சு வச்சிருப்பாங்க்... உடனுக்குடன் இறக்குமதியான காய்கறிகளும் கிடைக்கும் பெரிய பெரிய ப்ளாஸ்டிக்  ட்ரேகளில் அடுக்கி வைக்கப்பட்டிருக்கும். தேவையானவற்றை அங்கிருக்கும் ப்ளாஸ்டிக் பைகளில் எடுத்துப் போட்டு, அங்கே எடை போடுவதற்கென சிலர் டிஜிட்டல் எடை மிசின்களோடு அமர்ந்திருப்பார்கள், அவர்களிடம் எடை போட்டுக் கொள்ள வேண்டும். எடை மற்றும் அதற்கு விலையை ப்ரிண்ட் செய்து நமது காய்கறிப் பைகளில் ஒட்டி விடுவார்கள். பார்கோடு மூலம் பொருட்களி விலைகளை கணக்கிட்டு மொத்தமாக பணம் கட்டி விட வேண்டியதுதான். எல்லா சூப்பர் மார்க்கெட்களிலும் கிரெடிட் / டெபிட் கார்டுகள் ஏற்றுக் கொள்ளப்படும். 

சில படங்கள் இணையத்திலிருந்து




     


இது தவிர இறைச்சிக்கென்று தனியாக ஒரு இடம் இருக்கும். அங்கே அன்றன்று வெட்டி வைக்கப்பட்ட இறைச்சிகள் பாக்கெட்டுகளில் போட்டு வைத்திருப்பார்கள். முழு கோழி, பெரிய இறைச்சித் துண்டங்களும் கிடைக்கும். இறைச்சியில் விரும்பிகிற பகுதியை நமக்குத் தேவையான அளவுக்கு வெட்டியும் தருவார்கள்.



    


சரி உணவுப் பொருட்கள் வாங்கியாச்சு... இனி உணவகங்களையும், உணவு வகைகளையும் பார்ப்போம்....


டீக்கடையில் இருந்து தொடங்குவோம்...

நம்ம ஊரில் டீக்கடை என்று ஒன்று உண்டென்றால் அங்கே பொதுவாக, டீ,காபி, சிகரெட்,பஜ்ஜி, வடை, முறுக்கு.... இப்படி பல விதமான சிறு தீனிகள் கிடைக்கும். அதுபோல இங்கே மக்கள் அதிகம் வசிக்கும் இடங்களில் இருக்கும் டீக்கடைகளுக்குப் பெயர்... காஃபிட்டேரியா(cafeteria).

காஃபிட்டேரியாக்கள் பெரும்பாலும் மலையாளிகள் நடத்தும் கடைகளாக இருக்கின்றன. இங்கு டீ, காபி, பஜ்ஜி, சிந்தாமணி, வடை, வாழைப்பழம், கடலை மிட்டாய், எள்ளு மிட்டாய், இளநீர் என இப்படி பல தீனிகளும், பெரும்பாலான இந்திய உணவுகளும் கிடைக்கும். இட்லி, தோசை, புரோட்டா, புட்டு கடலை ,தால் ப்ரை... இப்படி நம்ம ஊர்ல கிடைக்கிற எல்லா உணவுகளும் இங்கு கிடைப்பதால் அதைப்பற்றி விரிவாக எழுதாமல் மேற்கொண்டு செல்கிறேன்... ஒன்றே ஒன்று சொல்லிக் கொள்ள விரும்புகிறேன்... இந்திய உணவு குறிப்பாக தமிழ்நாடு மற்றும் கேரள உணவுகள் எல்லாமே கிடைக்கின்றன.

ஆதலால் இங்கு புதிதாய் தென்பட்ட உணவு வகைகளை மட்டும் குறிப்பிட்டுச் சொல்ல விரும்புகிறேன்.
நம்ம ஊரில் கடுங்காப்பி, வர டீ, கட்டஞ்சாயா இப்படிக் குடிச்சிருக்கிறோம். இங்கு அதற்குப் பெயர் சுலைமானி... சுலைமானி அல்லது ப்ளாக் டீ... எல்லா காஃப்டேரியாவிலும் இந்த சுலைமானி கிடைக்கும். இங்கு கடைகளில் Dip Tea pocket  ஐ இது போன்ற தெர்மோகோல் அல்லது காகித குவளையில் போட்டு, சுடுதண்ணி ஊத்திக் குடுத்திருவாங்க.... ரொம்ப எளிதா சுலைமானி தயாராகிடும்.
 


இதே சுலைமானியை ஒரு பெரிய அலுவலகத்திலோ, உணவகத்திலோ அல்லது அரபி நண்பர்களின் விருந்திலோ குடித்தால் அதன் சுவையும் மணமும் இன்னும் கூடுதலாக இருக்கும். அங்கு தயாரிக்கப்படும் சுலைமானியில் அளவாக இனிப்பு கலந்திருப்பார்கள், கூடுதலாக இரண்டு அல்லது மூன்று சிறிய குங்கமப்பூ துகள்களை கலந்திருப்பார்கள். அது நல்ல நிறத்தையும் மணத்தையும் தரும். கீழே உள்ள படம் போல..




அதற்கடுத்ததாக சிக்கன் சவர்மா...

..............................

2 comments:

Semmalai Akash! said...

அசத்திட்டீங்க அண்ணா, தொடர்ந்து எழுதுங்க...

Balaji said...

நன்றி தம்பி.