உணவு வகைகள் -- சிக்கன் ஷவர்மா...

                        அமீரகத்தில் சிக்கன் ஷவர்மா என்பது பரவலாக பலராலும் உண்ணப்படும் ஒரு உணவு. பெரும்பாலானா காஃபிட்டேரியாகளில் இந்த சிக்கன் ஷவர்மா மாலை வேளைகளில் கிடைக்கும். மிகக் குறைந்த நேரத்தில் தயாரிக்கக்கூடியதும், சுவையானதாகவும் விலை குறைவானதாகவும் இருப்பதால் இந்த ஷவர்மா உணவு இங்கு மிகவும் பிரபலம்.

வாருங்கள் ஷவர்மா உணவைப் பற்றிப் பார்ப்போம்....


கோழி, வான் கோழி, ஆடு, மாடு ஆகியவற்றின் இறைச்சிகளில் ஷவர்மா தயாரிக்கப்பட்டதாம். இதன் பிறப்பிடமாக பல நாடுகளைச் சொல்கிறார்கள் அவற்றுள் லெபனான், துருக்கி,சிரியா போன்றவை குறிப்பிடத் தகுந்தது.

பெரும்பாலும் கடைகளில் கிடைப்பது சிக்கன் ஷவர்மாதான். எலும்பில்லாத கறியை, தயிர், வினிகர், உப்பு, ஆலிவ் எண்ணெய் பொன்றவற்றைக் கலந்து ஊற வைத்து, பின்பு ஒரு நீண்ட கம்பியில் குத்தி அடுக்கடுக்காய் வைத்து, பக்க வாட்டில் உள்ள அடுப்பின் உதவியுடன் சுடுகிறார்கள். 

கறி வேக வேக, குத்திவைக்கப்பட்டிருக்கும் கம்பியை சுற்றி எல்லாப் பக்கமும் நன்கு வேக வைக்கிறார்கள். நன்கு வெந்த கறியை பக்க வாட்டில் சிறு சிறு துண்டுகளாக வெட்டி கீழே இருக்கும் தட்டில் சேகரிப்பார்கள்.

பின்பு நீளமாக நறுக்கப்பட்ட தக்காளி, வெள்ளரிக்காய், லெட்யூஸ் போன்றவற்றை சேர்த்து, கொஞ்சம் ஹமூஸ் 

(இது ஒரு லெபனீஸ் தயாரிப்பு, வெள்ளை சுண்டக்கடலை, வெள்ளை எள், இன்னும் சில பொருட்கள் கலந்து ஆகியவற்றை அரைத்து, ஆலீவ் எண்ணெய் கலந்து இருப்பது ஹமூஸ்) கலந்து ஒரு ரொட்டியில் சுற்றிக் கொடுப்பார்கள்.  அந்த ரொட்டிக்குப் பெயர் குபூஸ்... ஷவர்மா குபூஸ்....

உடனடியாக கிடைக்கக் கூடிய ஒரு உணவு, சுவையானதும் கூட... நல்லா பசி அடங்கும்... விலையும் குறைவு... 3.50 திராம்ஸ்களிலிருந்து ஷவர்மா கிடைக்கிறது. நான் துபாய் வந்ததும் சாப்பிட்ட முதல் உணவு இதுதான்... :-)

(படங்கள் இணையத்திலிருந்து; நன்றி)

அடுத்து பார்பிக்யூ....